[majed_368]

السلام عليكم ورحمة الله وبركاته ..

اخواني اعضاء منتديات اليسير ..

انا بصراحة محتاج مساعدة لاني من جد متورط ..


بقولكم سالفتي ..

اخوكم ماجد توظف في منظمة حكومية ..

وجاءه في يوم من الأيام مديره وقال له ياماجد انت راح تكون مسؤول عن السياسات والإجراءات حقت المنطمة ..

انا قلت شلون ماعرف اسوي سياسات وإجراءات وش شايفني ..

قال لا مو ذا القصد القصد انك تصير متحكم فيها ..

قال بالعربي يكون عندك documentaion control


يعني تحصر الـ IPP والـ APP كلها ومنها عن طريقك راح نعرف وين مكان الـ IPP او الـ APP بالظبط ونعرف من وقفت عنده ومن يراجعها.. ومن اعتمدها ..


والحين صار للموضوع شهرين ولا انا داري وش اسوي .. وكيف ابدأ ..

اذا احد عنده نظام معين .. او يدلني على مكان معين اروح ادرس عنده متخصص في الشغله هذي ..

يكون سوا فيني اجر والله .

اخوكم ماجد.

[majed_368]

عشرين واحد دخل ولا احد يبي يساعد ..

[عطاالله التركي]

وعليكم السلام ورحمة الله وبركاته

مرحبا بك أخي ماجد في منتديات اليسير

ونتمنى لك الفائدة

ولا تأخذ الأمر هكذا بارك الله فيك

فالجميع هنا يودون المساعدة إن كانت متوفرة لديهم

وأنا شخصيا أرغب في مساعدتك ولكني لا أعرف شيئا عن documentaion control

و الـ IPP والـ APP

فاصبر وابحث هنا وهناك وإن شاء الله تجد المطلوب

[فيصل3960]

مجودي ... الحل بسيط جداااا ...

العملية عملية حصر ومتابعة .. يعني قاعدة بيانات صغيرونه

للوثائق تكون منفصله أو مربوطة بالنظام حق المؤسسة ..

انت بس اشرحلي بالتفصيل كيف عملية تداول الوثائق عندكم ومستعد
اصمم لك برنامج خفيف لطيف للمتابعة وارسله لك على بريدك الالكتروني

المهم لا تحرق أعصابك كل شي وله حل !!
مافيه شي مستحيل !!

وتراني ان وعدت أوفي .. مجودي !!

[majed_368]

هلا والله اخوي فيصل ..

انا شغال في منظمة حكومية .. وجاي فرش يعني جديد ..

وقالو لي ياطويل العمر انت راح تكون مسؤول عن الـ IPP والـ ِِAPP

حنا في بداية العمل تقريبا .. يعني فيه فريق تنظيمي لعمل الأنظمة واللوائح .ز

وهناك إدارات تعمل على الأنظمة واللوائح بنفسها ..

يعني الدعوة مخبوصة شوي .. ولا انتهت للحين .. فقالو يبوني انا اسوي نظام اكتب فيه جميع عنواين الأنظمة واللوائح لجميع الإداراة والأقسام. ويبون في النظام اعرف وين مكان كل لائحة يعني من اللي شغال عليها الآن اذا كانت لسا ماخلصت .. واذا اعتمدت من اعتمدها ومن راجعها. ..

يعني بالعربي يبون يحددون ماهي اللائحة وموجودة عند مين علشان اذا صار تأخير أو فقد لها يعرفون هي كانت عند مين موجودة ..

معليش اخوي فيصل يمكن شرحي غير واضح ..

[فيصل3960]

أخ ماجد ..

أبي منك التالي :

* سولي جدوليتضمن مايلي :
(((( بدون ما تعبيه بيانات)))

رقم اللائحة - مسمى اللائحة - مكانها(في أي ادارة) - هل تم اعتمادها (خانات خيار نعم /لا ) - في حال تم اعتمادها (تاريخ الاعتماد) - اسم المسؤول الذي اعتمدها ...

اعرضها على رئيسك بالعمل .. وخله يحط مقترحاته عليه بم أنك جديدهو راح يعرف أكثر طبعا ..

بعد ما يوافق عليها وينبهك على بعض النقاط .. أرسلها لي على بريدي
***************************
وانا راح ان شاء الله أصمم لك البرنامج وارسله لك .. تعرضه على رئيسك بالعمل يضع مقتحراته تقولها لي وأعدل على البرنامج ..

وان شاء الله تنحل مشكلتك ..

بعدين اسأل هل المؤسسة مربوطة بنظام شبكة .. بحيث يستطيع الجميع استخدام البرنامج .. ام انك وحدك انت من يستخدة وانت سوف تتابع الإدارات الأخرى

اسأل عن النقطة هذي وان شاء الله خير ..

[عطاالله التركي]

السلام عليكم ورحمة الله وبركاته

الله يعطيك العافيه أخوي

فيصل

وبارك الله فيك

مانراه من تواصل بينكم لتقديم المساعدة وللوصول إلى مايطلبه الأخ

ماجد

شي مثلج للصدر والله

نسأل الله أن لا يحرمك الأجر

ونسأل الله التوفيق لأخونا ماجد في وظيفته الجديده

[majed_368]

اخوي فيصل الله يوفقك ويجزاك خير..

مادري صراحة كيف اشكرك ..

ان شاء الله بسويها واعرضها على المدير مع اني اشك المدير يعرف لانه تعين بعدي مباشرة .. والله يعين ..

وان شاء الله ارسل لك الملاحضات على ايميلك ..

ودمت بخير ..

اخوك ماجد.

[majed_368]

اخوي فيصل ارسلت لك الملف على ايميلك ..

اما بالنسبة للبرنامج راح اكون انا الي استخدمه بس وانا اتابع الإدارات الأخرى ..


جزاك الله خير ونفع بك ..

[majed_368]

اخوي فيصل مادري وصلك ايميلي والا لا ؟؟


اخوك / ماجد.

[فيصل3960]

الأخ ماجد وصلني ايميلك زمااااان ... وأرسلت لك ايميل ..

أخ ماجد ..

كنت أبي منك توضيح بسيط .. حاول تترجملي أسماء الحقول .. لأن فيها اختصارات يختلف استخدامها من مؤسسة لأخرى ..

وهل تريد البرنامج بالعربي والا باللغة الانجليزية ... (ماعندي مشكلة)

وهل المقصود بـ QM البريد السريع ؟ يعني كويك ايميل !!! ... اشرح لي طريقة تداول الوثائق أو اللوائح عندكم (( شرح قصصي )) يعني ..

مثلا : اللائحة تكون بقسم كذا .. ثم يعملون فيها كذا .. ثم يسلمونها للبريد أو الصادر .. ثم تروح لقسم كذا ويعملون بها كذا .. ثم ترجع للبريد .. ويسلمها البريد لقسم معين ... حتى تصل في النهاية إلى ..الخ

بانتظارك أخ ماجد .. وترى البرنامج ما يأخذ معي أكثر من ساعة .

[majed_368]

هلا والله اخوي فيصل

توني قريت ردك يالغالي .. وبالنسبة للإيميل حقي كان عندي مشكله وانحلت وان شاء الله برسل لك ايميل اوضح فيه كل شي ..

اخوك . ماجد.